हे हिंदु-नृसिंहा प्रभो शिवाजीराजा

हे हिंदु-नृसिंहा प्रभो शिवाजीराजा 

हे हिंदुशक्ति-संभूत-दिप्ततम-तेजा 

हे हिंदुतपस्या-पूत ईश्वरी ओजा

हे हिंदुश्री-सौभाग्य-भूतिच्या साजा

हे हिंदु-नृसिंहा प्रभो शिवाजीराजा 

करि हिंदुराष्ट्र हें तूतें । वंदना

करि अंतःकरणज तुज, अभि- नंदना 

तव चरणिं भक्तिच्या चर्ची । चंदना 

गूढाशा पुरवीं त्या न कथूं शकतों ज्या

हे हिंदु-नृसिंहा प्रभो शिवाजीराजा 

हा भग्न तट असे गडागडाचा आजी

हा मग्न आज जयदुर्ग आंसवांमाजी 

ही भवानिची ह्या पुन्हा गंजली धारा

ती म्हणुनी भवानी दे न कुणा आधारा

गड कोट जंजिरे सारे । भंगले 

जाहलीं राजधान्यांची । जंगले

परदास्य-पराभविं सारीं । मंगले 

या जगति जगूं ही आज गमतसे लज्जा

हे हिंदु-नृसिंहा प्रभो शिवाजीराजा 

जी शुद्धि हृदाची रामदासशिर डुलवी 

जी बुद्धि पांच शाहींस शत्रुच्या झुलवी

जी युक्ति कूटनीतींत खलांसी बुडवी 

जी शक्ति बलोन्मत्तास पदतलीं तुडवी 

ती शुद्धि हेतुची कर्मी । राहुं दे

ती बुद्धि भाबड्या जीवां । लाहुं दे

ती शक्ति शोणितामाजीं । वाहुं दे

दे मंत्र पुन्हा तो, दिले समर्थें तुज ज्या

हे हिंदु-नृसिंहा प्रभो शिवाजीराजा 

 स्वर    -  लता मंगेशकर  गीत    -  स्वातंत्र्यवीर सावरकर

संगीत  -

पं. हृदयनाथ मंगेशकर

संगीत  - 

पं. हृदयनाथ मंगेशकर